اللهم إني من التوابين إليك ,,,, فطهرني

بسم الله الرحمن الرحيم

السلام عليكم

ذاك اليوم وأنا طالع من المسجد بعد صلاة المغرب
وقفت جنبي سياره وكان سواق هالسياره
شخص لي فتره طويله عنه وكان يدعى أبو حزام


ركبته معه وجلسنا نضحك وندردش مع بعض

وبصراحه إستغربت من أبوحزام
وش ذكره فيني بعد كل هالمده

فجأه

فتح معي أبو حزام الموضوع وليش هو جايني أصلاً

طلب مني أبوحزام الرجوع لساحات التفحيط
وإن المسئله كلها لاتتعدى أيام قليله
والمقصود منها مراهق يبلغ من العمر 16 سنه
يدعى السندريلا تعلق قلب أبو حزام فيه

وأنا كنت معارض فكرة الرجوع لساحات التفحيط
سواء بالسندريلا أو غير السندريلا

>>>>>> أتعب مع الفصحى يبو

قاطع أبو حزام كلامي بكلمه واحده
كانت على الوتر الحساس

قال أبو حزام: تكفى

قلت: لاتقول تكفى لعنبو بليسك
قسم بالله لأخليه يطلب رضاك

رسمت الخطه أنا وأبو حزام

وكانت خطتنا كالتالي :

أن أدخل أحد شوارع التفحيط اللي يتواجد
فيها السندريلا
وأكون على سيارة أبوحزام ومتلطم
عشان ماأحد يعرفني
وأقلب الشارع فوق تحت قدام السندريلا

بعدها أطلع من الشارع وأعطي أبوحزام السياره
يرجع فيها للشارع على أنه هو اللي كان يفحط

وبما إن السندريلا من عشاق التفحيط
راح يبذل المستحيل عشان يرضي أبو حزام


ويوم جا وقت الجد وقربت ساعة الصفر

عرفت السندريلا في أي شارع موجود
ووين واقف بالظبط ووش كان لابس


ومن هنا بدأت رحلة الدمار

دخلت الشارع وأخذته من أوله إلى أخره
بكم نطله .... وبكم عقده .... وبكم عكسيه
وطاحت عيني على السندريلا فجأه
وجلس قلبي يقول طربق طربق


بعد كم شوط في الشارع

توجهت لأبوحزام وركب معي
وعلى طول طلعت لبيتنا

ودار بيننا النقاش التالي :

أبوحزام: عكاااااااش وين رايح

عكاااااااش : رايح لبيت أمي

أبوحزام: خذ لك ليموزين وطس لبيتكم
خلني أرجع للسندريلا أركبه معي

عكااااااااش : سندريلا مين ياحمزه
أنا أفحط وأعرض حياتي للهلاك
وأخر شي تأخذ السندريلا
بارد مبرد على طبق من ذهب

أبوحزام: صاحي أنت والا مجنون
وش الكلام اللي تقوله

عكاااااااش : لأني صاحي ولامجنون
أنا عااااشق يبو والعااااااشق لايلام

بعدها بكم يوم إستأجرت سياره
ورجعت أفحط مره ثانيه

وقفت عند السندريلا بس ماعطاني وجه وطنشني

كان صعب وثقيل وملكع ماهو زي ماكنت متوقع

وزعت رقمي على منهم في نفس عمر السندريلا
ومن هنا سطع أسمي في ساحات التفحيط

صرت وقتها مشهور وجوالي مايسكت
من الإتصالات

كل مره يعرض علي سياره مسروقه
ومبلغ من المال
والهدف منها إني أفحط

وكان السبب دايم وأحد

من يجيب لي السياره ويدفع فلوس
أركبه معي بالسياره وأفحط فيه
عشان حبيب قلبه يشوفه مع المفحط المشهور

وأستمريت على هالحاله مدة شهر

كنت أفحط من بعد الساعه 12 في الليل
إلى الساعه 10 الصباح

وبما إني إنسان عادي ولأني نازل من كوكب المريخ

كنت أتعب من السهر وكثر السواقه

ولقيت الحل بتعاطي حبوب الكبتاجون ( مخدرات )
وصرت أعمر الحشيش عشان أجيب حركات جديده

وصرت أشرب الخمر عشان يطير العقل ويموت القلب
وأنسى شي أسمه الخوف

ووصلت لي معلومه إن السندريلا حق مخدرات

دخلت الشارع وكنت كاتب على القزاز الخلفي

نطله.... عقده .... عكسيه .... ( لعيونك يالسندريلا )

وقفت عند السندريلا وكنت ماسك كأس الشراب بيدي

ودار بيننا النقاش التالي:

عكااااااش : أركب ياحلو مايحلى الكأس من دونك

السندريلا: من قالك إني حق شراب

في هاللحظه فكيت درج السياره وطلعت كيس الحبوب

عكاااااااااش : طيب تنفع الحبوب ياقمر

السندريلا: ومن قالك إني حق حبوب بعد ( وهو يضحك )

في هاللحظه طلعت زقارة الحشيش من تحت الدركسون
وجلست ألعبها بيدي

عكاااااااش : يعجبني حق الزقاره أحسه شخص فاهم

السندريلا: وأنا بعد يعجبني الصريح ياعكااااااااااش


ركب معي السندريلا وجلست أفحط

فجأه دخل أبوحزام الشارع وكان مقهور
عشاني ركبت السندريلا معي

وجلس يفحط أبو حزام طالباً رضى السندريلا

فجأه

زحفت فيه السياره على الجمهوراللي يتفرج
وصدم له 4 منهم وإنحاش

وأنا رجعت أفحط وكنت جالس أشرب
والسندريلا جالس يحشش

وجت الدوريات وطلعت من الشارع

وأقنعت السندريلا يطلع معي برا الرياض
50 كيلو وان أسم هالأمكان ملتقى المفحطين

وكان هالسندريلا مايدري إن أسم هالمكان
معروف لدى المفحطين بأسم منتزه لوط





أشرقت الشمس وكنت وسط مبني
والعسكر يسحبوني مع رقبتي
والكلبشات في يدين ورجولي

دخلت على الظابط
وكان السندريلا جالس يبكي
وكان وجهه أنواع ألوان الطيف
>>>>> وش مسوي يبو الشباب

قال الظابط: أنت مغتصب هالمراهق
ومعتدي عليه بالضرب بمفتاح العجل

قلت: بصراحه أذكر أنه معي بالسياره
بس مأدري وش صار بيننا
لكن على العموم
جنت على نفسها براقش


دخلوني التوقيف وحصلت أبوحزام
وعرفت منه إن اللي صدمهم واحد مات
والثلاثه الباقين إصاباتهم خطيره

بعد 20 يوم أطلق سراح أبوحزام
بعد أن دفع أبوه دية الميت
وبعد أن طلعو المصابين من المستشفى
وتنازلو عنه
وانا جالس بين 4 جدران

طلبت الظابط وقابلته

عكااااااش: الحين أنتم ليش مجلسيني هنا
وش تطلبوني

الظابط: بسبب هالمسكين اللي دمرت مستقبله

عكاااااااش: أنا اللي دمرت مستقبله والا هو
اللي دمر مستقبلي جالس يصفط وجهه في
شوارع التفحيط وهو عمره 16 سنه كل مافحطت عنده سياره حذف كابه وجلس يرقص
وإذا وقف عنده مفحط بزقارة حشيش ركب معه


الظابط : أسئل نفسك لاتسئلني

عكاااااااش: ياسبحان الله وش هالنظام الفاشل

الظابط : وش تقصد

عكاااااااش: الحين اللي ذبح له نفس
ونوم له ثلاثه في المسشتفى طلعتوه
وأنا حابسيني لحد الحين

الظابط : هذا حادث سياره
دفع دية الميت والباقين تنازلو عنه
اما أنت مفسد في الأرض

عكاااااااش: الحين صرت مفسد في الأرض
وينكم فيه يوم كنت أمشي بالرياض
من شمالها لجنوبها
ومن شرقها لغربها
على سياره مسروقه وكلها حشيش وبلاوي
والا لازم أجيب كارثه في أي واحد
من أشكال السندريلا عشان تنتبه لي وتسجني




( القصه من نسج الخيال والمراد منها حكمه أتمنى
أن يصل مضمونها للجميع وأن تتم الإستفاده منها )


1ـ مع الأسف هذا هو واقع التفحيط
رفقة سوء , سرقات , مخدرات , شذوذ جنسي
إزهاق للأرواح , وأقل خسائر التفحيط ماديه

2ـ لماذا لاتعتبر حوادث المفحطين قتل متعمد
فهي الرادع كي نضمن عدم حدوثها مره أخرى

فالديه وحدها لاتكفي والسجن شهر لايكفي

خصوصاً ومجتمعنا معروف بحب الخشوم والواسطات

وأذكر إن أخوي مات قدام عيني وحنا في الإبتدائيه
في الشارع العام اللي جنب بيتنا أيام الإختبارات النهائيه
والسبب مفحط غشيم وده يصير طاره وسواق
قسم بالله رايحين للبقاله لانعرف تفحيط ولاهم يحزنون

بعدها تجمع علينا أقاربه في البيت
وبعد حب خشوم تنازل أبوي لوجه الله

طلع بعدها بشهر ونقل من الحي

أسئلكم بالله ماهو ظلم

ولد عمره 7 مدري 8 سنين يموت كذا بلوشي




3ـ إنتشر الشذوذ الجنسي بشكل ملحوظ في المملكه
فأصبح الشاذ لايخجل من الإعتراف بحقيقته
بل البعض منهم تسبب على نفسه وعلى غيره
بالموت أو الإعاقه
والسبب في ذلك / التفحيط

4ـ هالسندريلات اللي أعمارهم من 15 إلى 17 ونشوفها
في مقاطع التفحيط واللي تناقز على سيارة المفحط
وش عندها تناقز على السياره؟
وين أولياء أمورهم عنهم؟


5ـ السرقه إنتشرت في أوساط الشباب
فكم جاهل ورى القضبان عشانه سرق كامري
والسبب واضح / يبي يفحط ويصير طاره وسواق


6ـ المخدرات أتوقع مابقى إلا تباع في الأسواق
في كل مكان نحصلها
وكم مراهق أشوفه بعيني يترنح سكران
في شوارع الرياض

واللي يعرف له مفحط ياليت يسئله
وش هالطاقه اللي عنده
اللي تخليه يفحط ويلف الرياض شارع شارع
مدة 7 إلى 10 ساعات

7 ـ أدري إني تعمقت في الموضوع وتشعبت فيه
وطولت في القصه بشكل كبير

بس المقصود من هالشي أن أوصل لكل عضو/ه
إن مشكلة التفحيط ليست سيارات وحوادث
فالمشكله أكبر من ذلك

8 ـ أعتذر أن كان يوجد عضو في هالمنتدى
تحت يوزر السندريلا
فيشهد علي الله ماإخترت هاللقب
إلأ بعد إقتناع بنسبة 99% أنه لاوجود
لي هاليوزر في المنتدى

اولا اهنيك على الموضوع اخوي عكآآآآآآآآآآآش

ثانيآ اهنيك من اعماق قلبي على الخيال الواسع

ثالثا اهنيك على القصه وما تحتويه من عدة عدة مشاكل اجتماعيه وخطيره..

ولكن بما ان القصه والموضوع تحكي في لوبها عن التوبه ...

باب التوبه مفتوح حتى شروق الشمس من مغربهااا

وكثير من الشباب والفتايات العآصين لله عز وجل يريدون التوبه

ومهما فعل الآنسان فلآ تنعدم عنده الخوف من الله والتفكير في الموت وما بعد الموت

لكن من الذي يوقض هذه المشاعر في وسط شخص مبتعد عن الله عز وجل سنوات عده
بسلوب جميل ومقنع

والتوبه تريد قوة عزيمه كي يستمر عليهاااااا
لنه اذا تاب سوف يتغير عالمه واصحابه الذي عاشرهم فيه سنوات كثيره

ومن تاب تاب الله عليه

المهم اعفو عنا وغفررر لنا
وجعلنا من الآبرار الآخيار
وتوفنى مومنين

انك على كل شي قديررر


تقبل مروري المتواضع


طحيآآآآآآآآآآآآآآآآآآطي

يعطيك الف الف عافيه اخوي عكاش
وربي ابداع × ابداع
اهنيك ع موضوعك
اكتفي بتسجيل حضوري ومع الكلام الي قاله فش فاش < اول مره ما يناقش ههههه
تقبل مروري
تحيآتي

ابدااع وربي

يعطيك العافيه

يعطيك العافيه خيو عكاااااااااااااش

صبــــــــاح الكــادي عكااااش

تسلم يدينك على هالفكره والخيال النقـي ..

ومالموضوع الادلاله قويه على صفـاء قلبك ونقي عقليتك ..

المشهد او القصة الخياليه واقع يعيشه الكثير من شبابنا وان اختلف مجال الغفله والمعصيه ..

لكن للاسف ابن ادم لا يصحو من غفلته الا بعد مصيبه هذا من هدي ربي ..

اما البعض فقد يطمس الله على قلبه ويغلق على نفسه في بؤرة الفساد والهلاك ...

اللهم اهدنا لما تحبه وترضاه ..

تقبل مروري